روايه ابوس راسك يازمن ماعاد فيني للجروح ( روايه سعوديه )

[size=12][center]
السلاااااااااااام عليكم

مساء / صباح الخيرات

اليوم جايبه لكم قصه وربي تهبل
شفتها باحد المنتديات وحبيت انزلها لكم

للكاتبه (( معزوفه حزينه ))

ابوس راسك يازمن ماعاد فيني للجراح
روايه تجمع في طياتها
(الظلم والطمع _ الحب والقسوه_ السعاده والمعاناه)

/
\
/
\
ابوس راسك يازمن ماعاد فيني للجراح
خلاص يكفيني اسى ابوس راسك يازمن
يامكثر ذنوبك معي ماكل ذنب لك يباح
لامن زعلت اش تستفيد وش مكسبك من هالزمن
استسلمي ياعزتي لاصارت ايامي سلاح
كان نفسي اسعدك بس الليالي طولن
انا حاولت اشعل شمعتي بس المصيبه بالرياح
لاهي باللي نورن ولاهن باللي انطفن
اخترت فالدنيا ثلاث الستر وانصاف وصلاح
وكرهت بالدنيا ثلاث لا , ولايمكن , ولن

/
\
/
\
تعريف بالشخصيات الاساسيه
الجد عبدالرحمن (ابوعبدالعزيز) شخصيه قويه جدآ وقياديه عنيد واللي فراسه لازم يسويه
على كل قسوته الا ان فيه طيبه وخصوصآ للاشخاص اللي يحبهم
صار له اربع سنوات يتعالج في المانيا
اولاده
اولآ : عبدالعزيز وكان احب اولاده له توفي هو وزجته من 24 سنه في حادث سياره
ماانجبو غير ولد واحد اسمه فيصل اللي رباه جده عبدالرحمن وخاله الوحيد
فيصل عمره 29 سنه (طويل _ عريض _ جسمه رياضي جدآ بسبب ممارسته
لرياضة رفع الاثقال مايقارب الـ 6سنوات _ حنطي يميل الى البياض _ وسيم جدآ
بكل ماتعنيه الكلمه _ شخصيه غامضه _ عنيد _ خطواته كلها مدروسه _
عيبه انه صارم ونادرآ مايبتسم مع ان ابتسامته تضيف لوسامته الشي الكثير)

سلطان الولد الثاني لعبدالرحمن (ابو تركي) عمره 52 سنه وزوجته حصه (ام تركي)
عمرها 46 سنه راح تتعرفو على شخصيتها هي وزوجها مع الاحداث
تركي عمره 26 سنه طويل نحيف ملامحه فيها شي من الجاذبيه عصبي جدآ يشتغل مع ابوه
في شركتهم الخاصه
خالد عمره 24 سنه طويل عريض تقاسيم وجهه حلوه فيه وسامه وجاذبيه لكنه مغرور
ويحب المظاهر ميزته انه هادي
منال عمرها 21 سنه ثالث سنه بالجامعه طويله جسمها حلو ورشيق عيونها واسعه لونها عسلي
خشمها طويل سمراء شوي بس سمارها محليها اكثر بصفه عامه جميله
رنيم 19 سنه طويله لون عيونها بني ملامحها حلوه هاديه جدآ تختلف بكل شي عن اختها منال
ليال عمرها 15 سنه همها كله دراستها
عزام عمره 10 سنوات
يارا عمرها 6 سنوات

ابراهيم الولد الثالث لعبدالرحمن عمره 50 سنه (ابو راكان ) زوجته سعاد ام راكان عمرها 45سنه
راكان عمره 23 سنه طويل صدق نحيف شوي بس عرض كتوفه يغطي على نحافته وسيم ابتسامته حلوه
واللي يزيدها حلاوه غمازته اللي بخده اليسار
لمى عمرها 21 سنه طويله تميل للسمنه شوي على طول شعرها قصير لانها يعطيها ملامح طفوليه بيضاء
صديقة منال ومعها بالجامعه
التؤام لين وليان عمرهم 19 سنه صحيح تؤام بس مافيه أي شبه بينهم
لين (طولها عادي رشيقه عيونها بنيه بيضاء وجهها بيبي فيس تسحر الواحد من تبتسم
واللي مزود ابتسامتها حلا غمازاتها)
ليان مافيها شبه من احد (طويله جسمها رشيق حيل بيضاء شعرها طويل الى اعلى الفخذ
واسود ناعم حيل وكثيف مولانها ماتبي تقصه بس لانها على طول مشغوله واخر ماتفكر بنفسها
جميله جدآ فمها صغير بشفايف ورديه ريانه خشمها سلة سيف حواجبها مرسومه رسم رموشها كثيفه
لون عيونها غريب جدآ بنفسجيه محاطه بالسواد ينادونها راكان ولين بالفاتنه إليزبيث)
ملاحظه(الفاتنه اليزابيث ذات العيون البنفسيجيه لقب اطلق على الفنانه إليزابيث روزموند تايلور
بس إليزابيث كان لون عيونها بنفسجي فاتح بعكس بطلتنا بنفسجي غامق قليلآ محاط بالسواد)

يزيد عمره 14 سنه
راما اصغر العائله والدلوعه عمرها 8 سنوات


العمه نوره ام ماجد البنت الوحيده عمرها 48 سنه ارمله من 10 سنوات
اكبر اولادها محمد توفي وعمره 3شهور بسبب عيب خلقي بالقلب وتكون ام فيصل
لانها ارضعته مع ولدها
ماجد عمره 23 سنه صديق راكان مملوح طويل يدرس طب في الخارج
ندى عمرها 20 سنه ثاني سنه جامعه مملوحه وفيها جاذبيه وخفت دم
حياتها ضحك وناسه على طول


انتهينا من الشخصيات المهمه فيه شخصيات راح تظهر مع الاحداث
نبتدي اول جزء



في بيت ابراهيم (ابو راكان)

....... : لينوووووه وصمخ ماتسمعين انتي

ليان : عن الصراخ وقولي وش عندك

........ : امي تقول جهزي القوه والشاي والفطاير والحلا والعصاير والبخور
بيجونها جاراتها بعد المغرب
ليان : لمى حرام عليك ارحميني شوي وتعالي ساعديني وربي تعبت بروحي
لمى : والله لو تموتين ماساعدتك بروح اتجهز منال بتمرني بعد المغرب
ليان : لين بتروح معكم؟
لمى : لاطبعآ لان رنيم مو رايحه ليه تسألين؟
ليان : طيب ياعمري اقدر اطلب منك اشياء تشترينها لي محتاجتها ضروري
لمى : اقول فارقي صدق عطيتك وجه
طلعت لمى الدرج وطنشتها
ليان تكلم نفسها : ( ياربي اللي يشوفها يقول مو انا اختها وش سالفتهم على
ماعندهم غيري يحطون حرتهم فيه ليان سوي ليان جيبي ليان نظفي وربي قهر)

في نفس اللحظه ولكن في مكان بعيد وبالتحديد في ألمانيا (فرايبورغ)
....... : اشوف إن كلامي مو عاجبك؟
فيصل : ياجدي الله يرضى عليك من جد احس اني كرهت هالبنت من كثر ماتمدح فيها
الجد عبدالرحمن : ياولدي انا اعرف منك باللي تناسبك وتتفهمك
فيصل : جدي تكفى طلبتك ماابي اتكلم في هالموضوع بالنسبه لي الموضوع منتهي
وزواج ماراح اتزوج
الجد عبدالرحمن : هذا جزاتي عندك يافيصل لكن انا الغلطان مو انت اطلع برااا
ماابي اشوف وجهك وارسلي امين مالي قعده في هالمستشفى لو يوم واحد
امين (المرافق الشخصي له وكاتم اسراره)
فيصل : ياجدي الله يطول بعمرك انت اهدى ومالك الا طيبة الخاطر اللي تبيه يصير
الجد عبدالرحمن : شايفني اصغر عيالك تسكته بكلمتين (وبصراخ) قلت لك اطلع برا
وارسلي امين
فيصل يقرب من جده ويبوس راسه : ياجدي والله ثم والله ثم والله اني اتزوجها اذا ربي كتب
وهذا انا حلفت لك بدال المره ثلاث وانت تعرف فيصل اذا وعد اجل اشلون وانا اوعدك واحلفلك خلاص اهدى يالغالي أهم ماعندي رضاك وانا متأكد انك ماراح تختار لي الا الشي الزين
الجد عبدالرحمن بصراخ بس اهدء من قبل : ليان ماهي شي
فيصل وهو ضاغط على سنونه : ليان شيخة البنات ولاتزعل

في بيت ابو تركي بالمطبخ

ليان تحضر الضيافه لجارات امها وتغني بصوتها الحلو

دير بالك على حالك
عسى دنياك تحلالك
واذا بتطول الغيبه
فال الله ولا فالك
امانه خلنا نشوفك
عساها تسمح ظروفك
آ آ آ هـ ياجدي اشكثر اشتقت لك
.............. : لينوه ووجع خلصتي جاراتي على وصول
ليان : ايه يالغاليه ثواني ويكون كل شي جاهز بالمجلس
ام راكان : لاتطولين وبعدها اغسلي الملابس
ليان : يمه وربي تعبت من الصباح ماارتحت وعماتي الشغالات وينهم والا راحمتهم على حسابي
ام راكان : قص السان اشوفك قمتي ترادين بالكلام
ليان : لا يالغاليه ماعاش منو يرادك بالكلام ومن عيوني الحين اغسلهم
ام راكان : خلى عيونك لك واخلصي بسرعه
وطلعت وتركتها بالمطبخ
ليان : ( ياربي اموت واعرف ليه امي وابوي مايعاملوني مثل اخواني
لا بسم الله علي ماابي اموت خلاص هونت ماابي اعرف)
واخذت صواني الحلا والفطاير للمجلس
ام راكان : غسلتي الملابس؟
ليان : لا يمه القرين حقي مسوي اضراب ورافض يغسلهم
ام راكان : (بعصبيه ) تستهبلين ؟
ليان : يالغاليه سامحيني بس شايفتني توني خلصت الضيافه لجاراتك متى امداني اروح اغسلهم
ام راكان : تحركي روحي اغسليهم وقولي للين ولمى يلبسون وينزلون يستقبلون معاي الضيوف
ليان : لمى طلعت مع منال والحين بقول حق لين تنزل (ابتسمت) وانا يمه ماانزل استقبلهم معكم
ام راكان بحده : والملابس من يغسلهم قرينك بسم الله علي
ليان : لا انا غير راحمه قريني من التعب كافي انا
ام راكان : وش تقصدين ناويه تشتكين عند جدك مو انتي دلوعته
ليان : مااقصد شي يمه وجدي الله يشفيه ويرجعه لنا سالم ومو انا اللي اشكي عند احد
عن اذنك يمه وطلعت من المجلس وراحت فوق لغرفة لين

في غرفة لين
ليان : امي تقول قومي البسي وانزلي استقبلي معها الضيوف
لين : منو الضيوف ؟
ليان : منو يعني جاراتها وصاحباتها
لين : انزلي انتي استقبليهم معها ياقلبي مو فاضيه للعجز المتصابيات بكلم صاحباتي
ليان : لا انا بروح اغسل الملابس
لين : هههههههههههه ليه شغالاتنا انقرضو او انحاشو هروب جماعي
ليان : لا عماتي طال عمرهن تعبانات وصدر مرسوم سامي اني اريحهن واشتغل
بدالهن
لين : ههههههههههههههههههه حلوه عماتي قصدي عماتك
ليان والدموع تجمعت بعيونها وفكها يرتجف وبصوت فيه البكاء : لاتنسين تنزلين
لين تقوم من سريرها وترمي الاب توب على جنب : عمري اشفيك ليه هالدموع
ليان : مقهوره يالين نفسي اعرف ليه امي تعاملني غير عنكم نفسي اطلع والبس
وتكشخ واعزم صحباتي واكلمهم حالي حالكم نفسي لما اناديها ترد علي مثل ماترد عليكم
مو انا خير ؟ نعم ؟ هاه ؟ وشعندك ؟
لين : ياعمري انتي انا مااكفي انتي تؤامي احبك واحس فيك
ليان بفرحه : صدق لين تحسين فيني واللي بنفسي؟
لين : اكيد احس فيك واعرف اذا كنتي متضايقه او لا بس مو مثل مااسمع من صديقاتي
اللي عندهم تؤام يقولون انه يحسون ببعض واذا تألمت وحده الثانيه تتألم معها
بس انا وانتي تؤام غريب مختلفين بكل شي حتى الشكل مافيه أي تشابه بينا
انتي حتى ماتشبهي احد من اهلنا
ليان : جدي يقول اني اشبه جدته بالمره
لين : ياخال ابوي حك ظهري .. ماعلينا علشان كذا جدي يحبك اكثر من الكل
ليان : لاتظلمين جدي هو يحب الكل المهم لاتنسين تنزلين وانا بروح اشوف
قريني غسل الملابس او ينتظرني
لين : شنو قرينك ؟ مو فاهمه
ليان : كل انسان له قرين من الجن وانا قلت يمكن قريني رحمني وبيغسل الملابس عني
لين بخوف : يمه بسم الله حرام عليك خوفتيني
ليان : وليش الخوف حافظي على فرضك ولاتهجري قرآنك
وحصني نفسك بالاذكار وماراح يضرك شي بأذن الله
لين : مطوعة بريده اقلبي وجهك خليني ألبس
ليان : ههههههههه يقولون النصيحه بجمل
لين : ماعندي غير بقره واقفه قدامي غثتني بسوالفها تنفع ؟
ليان تسوي نفسها معصبه : انا بقره يالعنز
وقامت بينهم حرب بالمخدات مافك الاشتباك غير صراخ ام راكان وهي معصبه

في بيت العمه نوره (ام ماجد )

ندى تناقز مع الدرج وتصارخ : يمه يالغلا ماما ماماتي ماميتو ميمو
ام ماجد وهي جايه من جهة المجلس للصاله
ام ماجد : ميمو بعينك ياللي ماتستحين وش شايفتني قطوه عندتس تناديني ميمو
ندى : والله من قرادة حظي ماسمعتي كل اسامي الدلع اللي ناديتك فيها غير ميمو
ام ماجد : اخلصي وش عندتس على هالمصارخ تحررت فلسطين؟
ندى : لا
ام ماجد : ماتو اليهود؟
ندى : لا
ام ماجد : اذبحو قليلة الحياء كندره رايس ؟
ندى وهي تمسك ضحكتها : لا يمه بس اتوقع تنتحر من نفسها اذا اسمعت انك غيرتي اسمها
بس يمه ماقلتيلي كم مقاسها هههههههههههه ؟
ام ماجد : تطنزين على ياللي ماتستحين اخلصي وش عندتس ؟
ندى : ابد بس اشتقت لك وينك يالغلا بالعاده تترصدين لكل تحركاتي
ام ماجد : كنت بالمجلس عند راكان
ندى : راكان عندنا يامرحبا يامرحبا
ام ماجد : اقول ماودتس تروحين تخمينه بعد ؟
ندى : يابعد عمري انا عارفه انك ديموقراطيه ومن مناصرين الحريه الشخصيه
ام ماجد : ياقلية الحياء صدق اني ماعرفت اربيك
ندى : يمه وانتي على طول تصدقين امزح يالغلا اصلا انا اكرهه
تبين اروح اقتله علشان تقتنعين ؟
ام ماجد : والله انا اللي بذبحتس
ندى : ايه صح نسيت انه حبيب القلب رقم ثلاثه
ام ماجد : ومرقمتهم بعد ؟
ندى : يس افكورس فيصل رقم واحد ومجودي رقم ثنين وراكان رقم ثلاثه
وانا واسفابي طايحتن بكبدك كااني بنت البطه السوداء مو بنتك
خزتها امها بنظره ولا ردت عليها
ندى وهي تتصنع الجديه : تصدقين يمه اليوم وانا اتابع برنامج عن الاشاعات
وتأثيرها على المجتمع تكلمو عن الاشاعه اللي تقول ان فيصل ابتسم واللي انكرتهاكل وسائل الاعلام الـمـ
قطعت كلامها من شافت امها تناظرها بنظرات ناريه وناويه عليها
قامت تركض للدرج بس ماسلمت من علبة الكلنكس اللي جت بظهرها
ندى وهي تحك مكان الضربه وهي تكلم نفسها : يقولون القناص ياسر مادرو عن امي


في السوق

منال وهي تدلع بمشيتها بعبايتها المخصره ولثمتها اللي تزين اكثر منها تستر
منال : لمى تصدقين سمعت من ابوي ان فيصل بيرجع بعد يومين
لمى : انتي الى الآن عندك امل انه يتزوجك؟ يابتي اصحي فيصل يكره
ابوي وابوك كره العمى اشلون بيناسبهم
منال : لمى حرام عليك لاتحطميني خليه يكرهم براحته اهم شي يتزوجني
انا احبه تفهمين وش معنى احبه ومستحيل اتزوج غيره
لمى : منال ترى ماتسوى علي من تشوفيني غثيتيني بسيرته اصحي ياماما
انتي توهمين نفسك انك تحبينه انتي تحبين فلوسه شكله مركزه الاجتماعي
صح لكن انك تحبينه لشخصه فلا اصلأ متى عمرك شفتيه علشان تحبينه
غير مره او مرتين في بيت عمتي نوره وبدون مايشوفك
منال بعصبيه : كيفي احبه واحب كل اللي قلتيه ولاتقلبين علي
ترى اخوي ألف وحده تتمناه
لمى خافت من زعلها وانها ممكن تضيع عليها حب حياتها اخوها خالد
لمى : منال ياعمري عارفه انتي عارفه اني احبك ومااتمنى احد يتزوج فيصل غيرك
انا بس كنت ابي اناقشك واوضح لك ...
منال تقاطعها : لاتناقشيني ولا اناقشك تعالي خلينا نجلس بالكوفي


الساعه 10 في غرفة لين

لين تحط من هالالوان على وجها وتمسح تحب تجرب بالميك اب
رن جوالها انصدمت وهي تشوف ان المتصل جدها ماعمره سواها
لين : الوو (وسكتت )
الجد عبدالرحمن : ماتعرفين السلام عليكم ماعندك غير ها الالوو
لين وهي تخاف من جدها وهو مروق اجل اشلون وهو معصب
لين : هلا جدي السلام عليكم هلا وغلا طمني عنك وشلونك عساك بخير
الجد : هو انتي ماعندك حل وسط يالوو وتسكتين ياتصفين كل الكلام اللى
انتي حافظته مره وحده
لين وهي شوي وتبكي: جدي لاتعصب قول وش تبيني اقول وانا اقوله
الجد يضحك : هههههههه الى الآن وانتي دميعه دمعتك دوم جاهزه
لين : .......
الجد : يبه لين اسمعيني بطلب منك طلب
لين : هلا جدي امرني
الجد : ابيك تاخذين الجوال وتروحين عند ليان أبي اكلمها بس احد يدري
بالموضوع فاهمه
لين : ليه جدي ؟
الجد : من غير ليه نفذي وانتي ساكته
لين : ابشر جدي خلك معي ثواني
طلعت لين من غرفتها وماشافت احد راحت على طول لغرفة ليان دقت الباب ومحد رد
فتحت الباب ولق تليان نايمه
لين : ليان قومي أبيك ضروري
ليان وهي الى الآن مافتحت عيونها : لين حرام عليك خليني انام وربي توني حطيت راسي مو كافي كرف
من هالصبح فالبيت
لين : ليان جدي يبيك على الجوال
ليان قامت بسرعه وخايفه ليكون جدها سمعها
ليان بعد مااخذت الجوال : الوو هلا جدي
الجد سمع كلامها من شوي ومثل ماكان متوقع انها من يغيب عنها يعاملونها بقسوه
وهالشي زاده اصرار ينفذ اللي بداه
الجد : هلابك يبه اشلونك عساك بخير
ليان : الحمدلله ياجدي انا بخير ماناقصني غير شوفتك
الجد : لين عندك ؟ واذا عندك خليها تطلع ابي اتكلم معك لوحدنا
ليان وهي محرجه من لين : لين ياقلبي ممكن شوي بس
لين : بدت الاسرار اوكي ياقلبي اذا خلصتي انا بغرفتي
طلعت لين وسكرت الباب
ليان : هلا جدي خلاص طلعت شلونك يالغالي ومتى بتجي؟
الجد : انا تعبان ياليان وابي اشوفك قبل لا اموت
ليان بدت تبكي : بعيد الشر عنك ياجدي تموت وتتركني لمين
ابوس يدك قول انك تكذب علي قول انك بخير وراجع قريب
الجد : يبه لاتبكين اذا تحبيني بتجين وتزوريني ان شاء الله
ليان : جدي اشلون اجيلك حتى لو اقول لابوي هو بيجلك صح
لكن ماراح يرضى ياخذني اشوفك
الجد : ابوك وعمك ماهميتهم مت او لا كل همهم كم بترك لهم
اسمعيني يابنتي انا بطلب منك طلب ان وافقتي ونفذتيه بتجين وتشوفيني
واذا رفضتي طلبي بتعوض الله فيك مثل ماتعوضته في عيالي
ليان وهي بحيره من كلام جدي : هلا جدي امرني يالغالي واوعدك
بسوي كل اللي اقدر عليه
الجد : تقدرين عليه ان شاء الله بس ابي قبل تفهمين شي واحد
ان جدك مايرخص فيك ولولا حبي لك وخوفي عليك ماكان خيرتك
بين الموافقه او تنسين أن لك جد
ليان وهي خايفه من اللي تسمعه : اسمعك جدي
الجد : اسمعي بكره بيجي يملك عليك فيصل ولد عمك واذا على ابوك
بيكون موافق وبعدها بيومين بسوي حفل عائلي وياخذك وتجوني
ليان مصدومه من الكلام اللي تسمعه وماهي عارفه بأيش ترد
الجد بعد فترة صمت : اشوفك ساكته يابنتي افهم من سكوتك انك موافقه كنت
عارف ان بنتي ماراح ترفض طلبي ولا تعصي كلامي
ليان وهي مازالت مصدومه ومذهوله من كلام جدها ومالقت عذر تقوله غير
ليان : بس ياجدي اشلون اتزوج واختي لمى اكبر مني ماتزوجت
الجد : تزوجت والا بكيفها ماهو اكبر همي اذا ربي كاتب لها بيجيها نصيبها
المهم يالغلا ماابي احد يعرف بشئ حتى تتم الملكه فاهمه
ليان مالقت شي تقوله غير : ان شاء الله
الجد : الله يريحك يابنتي ويفرحك مثل مافرحتيني يله يالغلا مع السلامه وانتبهي لنفسك
ليان : مع السلامه جدي والله يحفظك لي من كل مكروه

قفلت من جدها وهي الى الآن مصدومه من اللي سمعته وانها ماعارضته
هالشي مستحيل يصير
( معقوله اتزوج كذا وين احلامي بفارس الاحلام والحب واحلامي بأيام الخطوبه
وأيام الملكه والزفاف الاسطوري وشهر العسل بجزيره من جزر هاواي كل هذا تبخر
كلها انجمعت بيوم واحد ملكه من شخص مااعرف عنه أي شي غير ان اسمه فيصل
ويكون ولد عمي عبدالعزيز الله يرحمه واكبر مني بعشر سنوات واللي اسمعه من ندى
انه يخوف حتى الابتسامه عمره ماابتسم )
الله يسامحك ياجدي خيرتني بين امرين احلاهم مر

(قفل الجد من ليان واتصل على فيصل يطلب منه يحجز على اول رحله للرياض لأن ملكته بتكون بعد بكره)

مر ساعتين على ليان وهي مو قادره تتأخذ قرار هل توافق على كلام جدها او لا ولما تعبت من كثر التفكير قررت تستخير
قامت واغتسلت وصلة الاستخاره بس ماحست بأي شي انتبهت انها نست تعطي لين جوالها اخذت الجوال واتصلت على ندى
اول ما رن التلفون ردت ندى بدون ماتعطيها فرصه تقول الوو
ندى : لين من وين طالعه الشمس اليوم قصدي من وين غاربه وش سر هالاتصال الغريب
ليان : ندى انا ليان مو لين
ندى : ليان سندريلا بيت خالي مانمتي الى الآن ليه ياعمري أعفوك اخيرآ من قومت الفجر وتنظيف البيت قبل لايصحون عماتك الشغالات وتضيق صدورهن لشافوه وسخ؟
ليان : خلصتي هذره والا توك ؟
ندى : لاياعمري ماخلصت بس اخلص لعيونك
ليان : ندى اسمعيني انا استخرت وماحسيت بشي وش معناتها ؟
ندى : طيب ياعمري أنا بسألك وانتي جاوبيني بـ ايه يا لا اوكي
ليان : ياخطيره والله وصرتي تعرفين يله اوكي
ندى : انتي قررتي تنحاشين ؟
ليان بستغراب : لا
ندى : طيب قررتي تقتلين احد ؟
ليان وهي معصبه : لا وبعدين انا اكلمك جد
ندى : وانا بعد اكلمك جد يله جاوبي قررتي تسوين اضراب وماتشتغلين ؟
ليان : مع اني ماادري ليه هالاسئله بس لا
ندى : اجل مافيه غيرها اكيد قررتي تشتركين بمسابقة ملكة جمال العالم ؟
ليان وهي ضاغطه على اسنانها من القهر : الشرهه مو عليك علي انا اللي أسأل وحده خبله مثلك
ندى : اجل ياحظي دام كل اجاباتك لا على شنو أستخرتي ؟
ليان : شي خاص عندك جواب قولي او ضفي وجهك
ندى : ول دام السالفه فيها تعصيب وسهرانه لساعه وحده اكيد تحبين ... ياقردي ليكون اعدوك الشغالات وصرتي تحبين السواق والا سواق الجيران ؟
ليان من قهرها سكرت التلفون في وجه ندى ورمت نفسها على سريرها اتصلت ندى اكثر من مره بس ماردت عليها بعد شوي وصلت رساله ترددت تفتحها او لا تخاف تكون للين وبعد تفكير فتحتها اكيد انها من ندى وفعلا طلعت الرساله من ندى تقول فيها ( ياقلبي اللي اعرفه انه مو شرط تحسين بشي على طول وبعد مده يومين او ثلاثه اذا ماحسيتي بشي صلي مره ثانيه ) مسحت الرساله واخذت الجوال وحطته بغرفة لين

اليوم الثاني العصر
فيصل طالع من المطار واصل للرياض تعبان ومهدود حيله مانام طول الليل راح على طول لبيته ودخل غرفته واخذ شور ورمى نفسه على السرير ونام وهي يدعي على ليان وحاقد عليها من كل قلبه

في غرفة منال
منال تكلم لمى على التلفون : انا لازم اشوفه يالمى بس المشكله انه مايجي لبيتنا ابد مايروح غير عند النسره عمتى
لمى : هذا انتي قلتيها اجل اشلون بتشوفينه ؟
منال : لقيتها .. امس ابوي قال انه بيجي بعد يومين يعني بكره صح ؟
لمى : طيب
منال : بتصل على العله ندى واعزم نفسي عندها اكيد هو لازم يزور عمته وبدور طريقه اشوفه فيها
لمى : ياغبيه انتي ماتدرين متى بيوصل بكره يمكن متأخر واكيد ماراح يروح لبيت عمتي على طول اكيد بيروح يرتاح في بيته واليوم اللي بعد بيروح يزور عمته
منال : صح معك حق اجل بخلي زيارتي لهم بعد بكره وان شاء الله اشوفه .. اسمعى انا بطلع للسوق اشترلي لبس حلو علشان اروح فيه امرك او لا
لمى : اكيد مريني انتظرك باي
منال : باي







نهاية الجزء الاول
هل بتوافق ليان وتنفذ كلام جدها ؟
هل ابو ليان بيوافق على فيصل ؟
وش راح تكون ردة فعل منال لما تعرف باللي سواه جدها ؟
والسؤال الاهم
وش السبب في الكره لليان من قبل ابوها وامها وتفريقهم بالمعامله بينها وبين اخوانها
هل لانها دلوعة جدها مثل مايقولون ؟؟؟ او لان فيه سر دفين وراء هذي المعامله ؟؟؟
اجابت هذه الاسئله والكثير غيرها سوف تعرفونه في الاجزاء القادمه

يلاااااااااااااا حبيباتي ابي اشوف ردودكم
عشان انزل بقيه الرواااااايه
انتظركم

مع كل الحب اترككم مع

الجزء الثاني

(الفصل الاول)


صحى فيصل من النوم الساعه 8 اخذ له شور وصلى اللي فاته وتصل على صديقه وليد
(فيصل ماعنده اصدقاء ماعدا طلال ولد خاله الوحيد و وليد صديقه واقرب له من روحه)
وليد : هلا والله بالنسيب
فيصل : اللي يسمعك يقول عندك خوات ومبتلش فيهن مايدرون ان كل اللي عندك اختين ومتزوجات
وليد بخبث : مايندرى يمكن انا اللي اناسبك
فيصل : اذا صرت خطابه بقولك تقدم ملفك
وليد : عاد توصى فيني
فيصل : وليد ترى والله الدنيا ضايقه فيني خلك من هالهذره وقولي وين اقابلك
وليد بقلق : سلامات يأخوي وش فيك
فيصل : اذا شفتك اقولك
وليد : طيب انا عازمك على العشاء نتقابل في مطعم الريف اللبناني
فيصل : لا مزحوم على طول وازعاج نتقابل في الجلوب في الفيصليه
وليد : صار على خير ان شاء الله
قفل فيصل من وليد واتصل على المطعم علشان الحجز
وطلع من بيته وهو يفكر بجده والقرار اللي اجبره عليه


بعد ساعه في المطعم

وليد : عسى ماشر وش اللي مضيق صدرك؟
فيصل : جدي ياوليد
وليد: ليه عسى ماشر زاد عليه شي؟
فيصل : لا حالته مثل ماهي بس قرر يزوجني
وليد : الله يرجك ياشيخ وانا على باللي سالفه كايده
وليه ماتبي تتزوج باقيلك سنه وتصك الثلاثين اللي متى ماتبي الزواج؟
فيصل : المشكله ماهي بالزواج المشكله بالبنت اللي بتزوجها
وليد بأستغراب : ليه وش فيها ؟
فيصل : فيها انها بنت عمي تعرف وش معنى اني اناسب واحد من اعمامي
وليد : يافيصل لاتظلم البنت يمكن تختلف عن ابوها ... الا هي بنت مين فيهم؟
فيصل : بنت عمي ابراهيم
وليد : على الاقل اهون من عمك سلطان
فيصل : كلهم مثل بعض مااخس من هذا الا هذا
وليد : طيب انت شوفها بفترة الخطبه والملكه يمكن تغير رايك بالبنت وتكتشف انها غير عن ابوها
فيصل : ههههههههههههههه ضحكتني قال خطوبه ياوليد ملكتي عليها بكره وبعدها يومين الين اجهز
جوازها واخذها ونروح ألمانيا عند جدي
وليد بصدمه : ملكتك بكره ومتى خطبت ومتى شاورو البنت كل هذا صار بدون مدري ؟
فيصل : انت الوحيد اللي يدري الى الآن
(وقاله فيصل كل السالفه)
وليد : والله غريبه وايش سبب اصرار جدك واستعجاله ؟؟
وايش معنى هالبنت بالذات مع انه فيه اللي اكبر منها ؟؟
فيصل : لاتسألني كل اللي اعرفه ان بكره العصر ملكتي وبس
آ آ آ هــ ياوليد اخر عمري اناسب عمامي اللي من طلعت على الدنيا
وانا ماشفت منهم غير الكره والعداوه
وليد : مستحيل انهم يكرهونك يافيصل انت ولد اخوهم بس يحز بخاطرهم
انك تمتلك اكثر من النص في شركة ابوهم
فيصل : ياوليد انت عارف ان مالهم شي عندي والخير اللي عندي ورثي من ابوي وامي
وليد : يافيصل انا عارف كلها هذا بس هم مو مقتنعين يحسون ان ابوهم عطاك اكثر من حقك
فيصل : الا قول انهم طماعين ومايملا عينهم غير التراب ويكفى اني ساكت عن بلاويهم
عمى سلطان بعد ماشبع من اختلاساته فتح له شركه خاصه وفتكيت منه هو وولده تركي
صار يحاول يسرق مناقصاتنا وعمي ابراهيم على نفس خطاه كل يوم اختلاس
وساكت لهم بمزاجي كله علشان انهم عمامي وعلشان مضيق صدر جدي
وليد : يافيصل انا عارف كل هذا والله يهديهم بس المهم ماقلت لي وش معنى هالبنت؟؟
فيصل : علمي علمك يقول انها هي اللي تناسبني وتفهمني
وليد : جدك يحبها والا مثل البقيه ؟
فيصل بسخريه : ههههههههه قال يحبها احيانا اشك انه يحبها اكثر مني ومن امي ام ماجد
وليد : خلاص يافيصل ليه مضيق صدرك دامه يحبها كل هالحب معناها البنت تختلف عنهم
وتستاهل انك تزوجها ولاتنسى ان جدك ذكي وكاشف عمامك
فيصل : فكرة في كل هذا بس مايمنع اني ماابي هالزواج واحس اني مغصوب عليه
وليد : يافيصل انت مو بنت علشان تنغصب
فيصل : بس خيرت بين رضى جدي وبين حريتي
المهم قفل على هالموضوع وخلنا نتعشى


الساعه 10 في غرفة ليان

خلصت ليان من صلاة الاستخاره للمره الثانيه وحطت راسها على مخدتها ونامت
حست بيدين تهزها وتحاول تجلسها
فتحت عيونها لقت لين ماسكتها وتسمي عليها
لين : ليان عمري اشفيك وش هالحلم اللي خلاك تصارخين وتنادين على جدي
كانت ليان ساكته وترتجف من الحلم اللي شافته وتحس بالالم في كل جسمها
ماكانت تبي تقول لين اللي شافته : لا بس كنت اتحلم بجدي يمكن من كثر تفكيري فيه
وشوقي له .. كم الساعه؟
لين : الساعه 2
ليان : صحيتك من نومك؟
لين : لا ياعمري ماكنت نايمه وحسيت بجوع ولما جيت انزل تحت سمعت صوت صراخك
ليان : طيب ياعمري روحي كلي بالعافيه عليك وانا بقوم اصلي لي ركعتين ورجع انام
لين : اوكي ياقلبو ولو بغيتي شي ناديني
وطلعت وقفلت الباب وراها
جلست تفكر بالحلم اللي شافته وايش بيكون تفسيره
حلمت انها بمكان مهجور بس تحس انه مو غريب عليها
سمعت صوت جدها يكلمها بس بدون ماتشوفه كان يوصيها على نفسها
ويقولها مهما قالو فيك ومهما سوو لا تضعفين كوني دايم قويه
حاولت اني احميكي منهم وجاء دورك تحمين نفسك
صارت تدور عليه بس اللي لقتهم اهلها مو جدها كانت وجيهم غريبه
عليها حاولت تهرب وتدور على جدها سمعت نباح كلاب وكل ماله الصوت يقرب
وفجاءه هجمو عليها كل ماهجم واحد نهش من لحمها كانت تصرخ وتنادي
على جدها وتناظر في اهلها بس كانو واقفين ويتفرجون عليها
قامت من سريرها وغتسلت وصلت ركعتين وجلست تقراء قران لعلها ترتاح
وهي كلها اصرار انها تنفذ كلام جدها

في بيت فيصل

صحى من نومه الساعه 8 الصباح اخذ شور ولبس وطلع للشركه
صدق انه الخميس بس مايمنع انه يروح يشوف شغله
دخل الشركه شاف اغلب الموظفين مداومين طلع فوق لمكتبه
شاف راكان وخالد مداومين
لما شافهم تذكر معارضته لجده في انهم يشتغلون في الشركه
بس طلع تركي وراكان غير ماتوقع صدق انه مايستلطف خالد
لانه مغرور وشايف نفسه
بس اثبتوا انهم مخلصين ونشيطين بشغلهم
فيصل يكلم نفسه ( الله يحفظك ياجدي كل مره تثبت لي ان قراراتك حكيمه
بس ان شاء الله يكون قرارك بزواجي من ليان صح مثل البقيه
وماتكون كبوة حصان وغلطة الشاطر بألف وانا الي بدفعها)


الــــــــــســــاعه 10

قامت ليان من نومها نشيطه اخذت شور ولبست ونزلت تحت كان وجهها صافي ومشرق
لانها المره الوحيده اللي تنام الى هالوقت بالعاده تصحى من الفجر

شافت امها جالسه تفطر
لين بعد ماباست راس امها : صباح الخير يالغلا
ام راكان : صباح النور اشوف انك مثل الحصان اجل ليه لين تقول انك تعبانه
ليان : سلامتك يالغاليه بس البارح تعبت شوي والحين الحمدلله بخير
ام راكان : دامك بخير خلصي فطورك وقومي شوفي شغلك
ليان : ان شاء الله يالغاليه
خلصت فطورها واستلمت شغل البيت كالعاده

الـــــــــــســـاعه 1 ونص على الغداء في بيت ابو راكان

ابو راكان : كيف كان الشغل اليوم ؟
راكان : مثل مايسرك وعلى فكره فيصل داوم اليوم
(ارتجفت ليان وهي ماسكه الملعقه نزلتها بسرعه قبل لا احد يحس)
ابو راكان : وش جايبه اليوم عمك يقول انه ماهو جاي غير الجمعه او السبت؟
راكان : والله يالغالي علمي علمك
ابو راكان : عمك درى عنه انه مداوم؟
راكان : مدري والله بس اكيد تركي بيقوله
ابو راكان : ايه زين .. انا قايم انام لااحد يزعجني
طلع ابو راكان لغرفته اول مادخل غرفته الا جواله يرن
ابوراكان وهو يناظر جواله (الله يستر وش عنده داق ليكون العله فيصل كاشف شي وقايله)
ابو راكان : حي الله هالصوت وراعيه
ابو عبدالعزيز: تحيا وتدوم وينك فيه ؟
ابو راكان دام السالفه وينك فيه على طول اجل رحنا فيها : في البيت وشلونك عساك طيب؟
ابو عبد العزيز : ليه يهمك؟
ابو راكان: وشلون مايهمني انتي تدري بغلاتك عندي بس مدري منهو اللي مغيرك علي؟
ابو عبدالعزيز : ايه ادري انك تغليني وانا اغير ماتغير.. عندك احد ؟
ابو راكان : لا انا بغرفتي فيه شي صاير شي
ابو عبدالعزيز : مافيني غير العافيه .. اسمعني ونفذ اللي بقولك عليه
وماابي مخلوق يدري بالسالف هالا لما يتم كل شي
ابو راكان : ابشر باللي يسرك
ابو عبدالعزيز: فيصل خطب مني ليان وانا وافقت وقلت له انك موافق وبيجي اليوم بعد العصر ومعه الملاك والشهود
ابو راكان بعصبيه : وليه وانا مالي كلمه وبعدين لمى اكبر منها وماتزوجت
ابو عبدالعزيز : لمى اذا ربي كاتب لها بيجيها نصيبها
ابو راكان : دامك بتخطب له ليه ماخطبت له وحده من بناتي لمى او لين مالقيت غير ليان
ابو عبدالعزيز بعصبيه : وليان بنتك بعد ولاتحدني ياابراهيم على شي مابيها لا والله واللي
رفع سبع وخفض سبع اني لا اقسم كل حلالي بيع وشراء بين فيصل ونوره وليان ومترك لك انت
واخوك ريال واحد
ابو راكان : يايبه الى متى وانت تتحكم في حياتي مايكفي اللي راح
ابو عبدالعزيز : عمري ماتحكمت في حياتك ياابراهيم غير مره وحده وخذت كثررر مقابلها
وحتى هالمره ماراح ابخل عليك وبكلم المحامي بعد مايتم كل شي مثل ماابي يحول بحسابك
20مليون ويسجل الارض اللي بمكه اللي مناشبني عليها بسمك
كل اللي ابيه منك تتصل على فيصل الحين وتقوله انك تنتظره العصر ويجيب معه الملاك والشهود
ابو راكان : مايصير خاطرك الا طيب بس لمتى ماتبي احد يعرف بالموضوع
ابو عبدالعزيز : بعد ماتم الملكه سو عشاء واعزمهم عليه وذا سالوك عن المناسبه قولهم بمناسبة ملكة فيصل على ليان
ابو راكان : يصير خير ان شاء الله
قفل ابو راكان من ابوه وهو معصب بس اللي مهون المبلغ على قيمة الارض على الفلوس اللي عنده بتدخله
شريك بالنص في شركة اخوه
اخذ جواله واتصل على فيصل واتفق معاه

انتهى الفصل الاول من الجزء الثاني
اعذروني لقصر البارت ولان مافيه احداث مهمه لكن كان هذا البارت لتوضيح علاقة فيصل باعمامه
واوعدكم بالافضل ان شاء الله في الجاي

تحياتي لكم
دمتم بود
وانتظرو البقيه

يسلمو